BAKI, 9 iyun — Sputnik. "Formula 1" komandaları artıq cümə günü, iyunun 10-da başlayacaq Azərbaycan Qran Prisinə hazırlıqlarını davam etdirirlər.
Bakıda həftəsonu yarışın başlaması ərəfəsində komandaların texniki heyəti avtomobilləri (bolidlər) cümə günü təlim-məşq yarışlarına hazırlayır, pilotlar isə Bakıda keçiriləcək yarış marşurutu ilə şəxsən tanış olur, orada gəzir və onun xüsusiyyətlərini öyrənirlər.
İkiqat dünya çempionu ispaniyalı Fernando Alonso cümə axşamı yarışın keçiriləcəyi yolda gəzərkən diqqəti cəlb edib. "Alpine" komandasının pilotuna Bakıda keçiriləcək yarış marşurutu tanış gəlməlidir, çünki o, hələ 2016-cı ildə, yarış Avropa Qran Pri adlananda, Alonsonun özünün Bakı mərhələsinin ulduz səfiri olanda paytaxt küçələrində şütüyüb.
Pilotların trasa çıxması ictimaiyyətdə böyük marağa səbəb olub və onlar öz telefonları ilə ulduzların şəkillərini çəkmək fürsətindən istifadə ediblər.
Komandaların heyəti əsasən avtomobillərin (bolidlər) quraşdırılması və digər hazırlıq işləri ilə məşğul olurlar.
Baş tutacaq yarış 2019-cu ildən bəri ilk dəfə tamaşaçıların iştirakı ilə keçiriləcək. Ötən il koronavirus pandemiyası səbəbindən Bakı mərhələsi boş tribunalarla keçirilib, 2020-ci ildə isə eyni pandemiyaya görə Azərbaycan Qran Prisi baş tutmayıb.
"Kral yarışları"nın Bakı mərhələsinin qalibi aşağıdakı pilotlar olub: Niko Rosberq (2016-cı il, Mercedes), Daniel Rikkardo (2017-ci il, Red Bull), Lyuis Hemilton (2018-ci il, Mercedes), Valtteri Bottas (2019-cu il, Mercedes), Serxio Peres (2021-ci il, Red Bull).
Digər maraqlı xəbərləri həmçinin Sputnik Azərbaycan-ın Teleqram kanalından izləyin.