BAKI, 29 may - Sputnik. Türkiyə Silahlı Qüvvələri İraqın şimalında PKK terror təşkilatının 18 silahlısını zərərsizləşdirib.
Bu barədə Türkiyənin Milli Müdafiə Nazirliyi məlumat yayıb.
Məlumata görə, İraqın 3 rayonunda aprelin 18-dən bu yana davam edən "Pençe-Kilit" əməliyyatı bölgəsində PUA terrorçulara hücum edib.
Milli Müdafiə Nazirliyi Türkiyə Silahlı Qüvvələrinin bölgədə terror təhlükəsini aradan qaldırmağa davam edəcəyini vurğulayıb.
Aprelin 18-də Türkiyə Müdafiə Nazirliyi İraqın şimalında Kürdüstan Fəhlə Partiyasının (PKK) yaraqlılarına qarşı yeni hərbi əməliyyata başlayıb.
"Pençe-Kilit" adı verilən bu əməliyyata xüsusi təyinatlılar və hərbi hava qüvvələri cəlb olunub.
Türkiyədə qadağan olunmuş PKK-nın silahlı münaqişəsi 1984-cü ildə başlayıb və 2015-ci ildə yenidən alovlanıb. İraqın şimalında, Türkiyə Silahlı Qüvvələrinin hava və yerüstü əməliyyatlarının keçirdiyi yerdə PKK-nın bazaları yerləşir.
Türkiyə Prezidenti Rəcəb Tayyib Ərdoğan 2015-ci ilin iyul ayından bu yana ölkə daxilində 6 min, ölkə xaricində isə 6,9 min PKK üzvünün məhv edildiyini, Türkiyə təhlükəsizlik qüvvələrinin itkilərinin 1,2 min nəfərdən çox olduğunu bildirib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.