BAKI, 27 may — Sputnik. Ukrayna rəhbərliyi daima ziddiyyətli bəyanatlar verir ki, bu da Ukrayna tərəfinin nə istədiyini və onun gerçək vəziyyəti reallaşdırmağa hazır olub-olmadığını tam başa düşməyə imkan vermir. Bu barədə jurnalistlərə açıqlamasında Rusiya prezidentinin mətbuat katibi Dmitri Peskov məlumat verib.
Peskov Ukrayna Prezidenti Volodimir Zelenskinin münaqişəyə son qoymaq üçün Rusiya ilə danışıqlar aparmaq lazım olduğu, lakin Rusiya tərəfinin bunu istəmədiyi barədə bəyanatını şərh edərkən deyib.
"Birincisi, danışıqlar Ukrayna tərəfinin qərarı ilə və onların seçdiyi xəttə uyğun olaraq dondurulub. Bu, Zelenskinin qeyd olunan bəyanatları ilə tamamilə ziddiyyət təşkil edir. İkinci, ümumiyyətlə, Ukrayna rəhbərliyi davamlı olaraq bir-birinə zidd bəyanatlar verir ki, bu da Ukrayna tərəfinin nə istədiyini, onların real vəziyyəti dərk etməyə hazır olub-olmadığını tam başa düşməyə imkan vermir", - Peskov bildirib.
Ukrayna ilə danışıqlarda Rusiya nümayəndə heyətinə rəhbərlik edən Rusiya prezidentinin köməkçisi Vladimir Medinski bir müddət əvvəl danışıqların dondurulmasının tamamilə Kiyevin təşəbbüsü olduğunu bildirmişdi.
Xatırladaq ki, Rusiya cari ilin fevralın 24-də Ukraynada hərbi əməliyyata başlayıb. Rusiya Prezidenti Vladimir Putin onun məqsədini "səkkiz il ərzində Kiyev rejimi tərəfindən zorakılığa və soyqırıma məruz qalan insanların müdafiəsi" adlandırıb.
Onun sözlərinə görə, bunun üçün "Ukraynanın demilitarizasiyası və denazifikasiyası"nın həyata keçirilməsi, Donbasda "mülki əhaliyə qarşı qanlı cinayətlərə" cavabdeh olan bütün hərbi cinayətkarların məsuliyyətə cəlb edilməsi planlaşdırılır.
Rusiya Müdafiə Nazirliyinin məlumatına görə, RF Silahlı Qüvvələri yalnız hərbi infrastruktura və Ukrayna qoşunlarına zərbələr endirir və martın 25-nə olan məlumata görə, onlar birinci mərhələnin əsas tapşırıqlarını yerinə yetiriblər - Ukraynanın döyüş potensialını xeyli azaldıblar.
Rusiya MN xüsusi əməliyyatın əsas məqsədinin Donbasın azad edilməsi olduğunu bəyan edib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.