BAKI, 28 aprel — Sputnik. Bakı şəhərinin şərq hissəsində mövcud şəbəkələrin dayanıqlı su təchizatını aparmaq və su şəbəkəsi olmayan ərazilərdə şəbəkələrin yaradılması üçün Bakının şərq hissəsində Ceyranbatandan Qala və Zirə istiqamətində üçüncü magistral kəmərin tikintisinə tələb var. Bunu “Azərsu” ASC-nin mətbuat katibi Anar Cəbrayıllı deyib.
"Report"un xəbərinə görə, A.Cəbrayıllı qeyd edib ki, Bakının yeni yaşayış massivlərinin ən çox tikildiyi ərazisi şərq hissəsidir:
“Bu ərazidə iki kəmər var. Bunlardan biri 1980-ci illərdə Ceyranbatan-Maştağa kəndi istiqamətində çəkilib. Digəri 2013-cü ildə istismara verilib".
O bildirib ki, mütləq üçüncü magistal su kəməri çəkilməli və kəmərin üzərində bir neçə yerdə mərkəzi anbarlar tikilməlidir ki, insanların su təminatı təşkil olunsun.
"Azərsu" ASC-nin mətbuat katibi Anar Cəbrayıllı
© Sputnik / Irade JELIL
A.Cəbrayıllının sözlərinə görə, qeyd olunan kəmər çəkilməsə, bu gün su olmayan ərazilərə suyun verilməsi mümkün olmayacaq:
"Şəbəkə qursaq belə, həmin şəbəkələrə verməyə su tapmayacağıq. Bununla bağlı biz hökumətə təkliflərimizi təqdim etmişik” .
Digər maraqlı xəbərləri həmçinin Sputnik Azərbaycan-ın Teleqram kanalından izləyin.