BAKI, 26 aprel — Sputnik. Azərbaycanda Ramazan bayramı namazının vaxtı açıqlanıb. Qafqaz Müsəlmanları İdarəsinin (QMİ) sədr müavini Fuad Nurullayev bildirib ki, bayram namazı Göy məscid və Əjdərbəy məscidində mayın 2-si saat 09:00-da, Təzə Pir məscidində isə saat 10:00-da qılınacaq. "Digər məscidlər də namazlarını saat 09:00 və ya 10:00-da təşkil etməkdə azaddırlar", - o qeyd edib.
O, həmçinin qeyd edib ki, bu il Ramazan bayramı namazı ənənəvi qaydada qılınacaq. Artıq bunun üçün icazə verilib. (APA)
Qeyd edək ki, koronavirus pandemiyası ilə əlaqədar bayram namazlarının ənənəvi qaydada qılınması məhdudlaşdırılmışdı.
Azərbaycanda Ramazan bayramı mayın 2-si və 3-də qeyd ediləcək.