BAKI, 21 aprel — Sputnik. Bakıda məscidlərdə Qədr (Əhya) gecəsi keçirilib. Sputnik Azərbaycan Fatimeyi-Zəhra məscidində Qədr gecəsindən reportajı təqdim edir.
Ramazan təqviminə əsasən, Qədr gecəsi 19 aprel (Razamanın 18-ci günü), 21 aprel (Ramazanın 20-ci günü), 23 aprel (Ramazanın 22–ci günü) və 27 aprel (Ramazanın 26-cı günü) tarixlərinə təsadüf edir.
İslam alimlərinin bildirdiyinə görə, Qurani-Kərim peyğəmbərimizin (s.a.s.) mübarək qəlbinə iki cür nazil olub: 23 il ərzində hissə-hissə və Qədr gecəsində bütövlükdə. Həzrət Peyğəmbər (s.a.s.) hələ insanlara Quranı çatdırıb qurtarmamışdan öncə Qədr gecəsində Allah kitabını bütövlükdə mənimsəmişdi.
Qədr gecəsi elə bir gecədir ki, bütün il boyunca o qədər fəzilətli gecəyə rast gəlmək olmaz.
Bu gecədə bir əməl etmək min ayda əməl etməkdən daha da xeyirlidir.
Mələklər və mələklərin ən əzəmətlisi olan ruh bu gecə Allahın izni ilə yerə enərlər və İmam Mehdinin hüzuruna yetişərlər və hər şəxs üçün təyin edilmiş müqəddəratı ona təqdim edərlər.
Qədr gecələrinin bəyənilən əməllərindən biri də məğrib azanından sübh azanına qədər oyaq qalmaq və dualar etməkdir.
Əhya gecəsinin əməllərindən biri də Quranı başa qoyub, Allahın, Peyğəmbərin (s.a.s) və İmamların adlarına and verməklə Allahdan günahlarının bağışlanmasını, dünya və axirət istəklərini bildirməkdir. Bu əməlin mənası Allahın insan üçün göndərdiyi kitabı başı üstə qoruyub saxlamaq deməkdir.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.