BAKI, 5 aprel — Sputnik. Bakı böyük şəhər bələdiyyəsinin yaradılması təklif olunur.
Sputnik Azərbaycan xəbər verir ki, bu təkliflə Milli Məclisin Regional siyasət komitəsinin sədri Siyavuş Novruzov Milli Məclisdə müzakirəyə çıxarılan "Bələdiyyələrin fəaliyyətinə inzibati nəzarəti həyata keçirən orqanın illik məruzəsi haqqında" sənədin müzakirəsi zaman deyib.
O bildirib ki, Azərbaycanda vahid bələdiyyə sistemi yaradılmalıdır. İlkin olaraq, Gəncə, Sumqayıtda şəhər bələdiyyələri vahid sistemə keçməlidir. "Əgər bu effektiv olarsa, Bakı böyük şəhər bələdiyyəsinin yaradılması məsələsinə baxıla bilər. Böyük şəhərlərdə vahid bələdiyyə sistemi qurulsa, yaxşı olar. İşğaldan azad edilmiş ərazilərdə bələdiyyələr formalaşsa, 500-ə yaxın yeni bələdiyyə olacaq. Ona görə də təklif edirik ki, bu say azaldılsın. Bələdiyyə üzvlərinin sayının azaldılmasını da təklif edirik".
Qeyd edək ki, Milli Məclisin bu gün keçirilən iclasında “Bələdiyyələrin fəaliyyətinə inzibati nəzarəti həyata keçirən orqanın illik məruzəsi” müzakirəyə çıxarılıb. Məruzəni ədliyyə nazirinin müavini Vilayət Zahirov təqdim edir.
Bildirilib ki, pozuntulara yol verən bələdiyyələrin vəzifələri şəxsləri barəsində məhkəmələrə göndərilmiş inzibati xəta haqqında protokollarla 80-dək bələdiyyə sədri inzibati məsuliyyətə cəlb edilib, cinayət xarakterli 27 fakt üzrə materiallar isə prokurorluğa göndərilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.