BAKI, 9 mart - Sputnik. Martın 8-də ABŞ Rusiya nefti, bir sıra neft məhsulları, mayeləşdirilmiş təbii qaz (LNG) və kömür idxalına qadağa qoydu. Ardınca Böyük Britaniya daha sonra ilin sonuna kimi Rusiyadan neft və neft məhsulları idxalını dayandıracağını açıqladı.
Ukrayna hadisələri ilə əlaqədar Qərbin Rusiyaya qarşı iqtisadi sanksiyaları dünya neft bazarına “dəhşətli” təsir göstərəcək. Bunu Türkiyənin enerji və təbii ehtiyatlar nazirinin müavini Alparslan Bayraktar RİA Novosti-yə bildirib.
“Bu, dəhşətli olacaq” - deyə Bayraktar Hyustonda keçirilən “CERAWeek” beynəlxalq enerji konfransı çərçivəsində Qərbin Rusiyaya tətbiq etdiyi məhdudiyyətlərin qlobal neft bazarına təsirini qiymətləndirərkən deyib.
Onun fikrincə, koronavirus pandemiyasının tənəzzülü və dünya iqtisadiyyatının bərpası fonunda ölkələrdən, əksinə, neft hasilatını artırmaq tələb olunur.
"Rusiya neftini dünya bazarında əvəz etmək çox çətin olacaq. Rusiya dünyanın ən böyük neft istehsalçısıdır", - deyə Bayraktar vurğulayıb.
O hesab edir ki, ABŞ-ın Rusiyadan neft idxalına tətbiq etdiyi məhdudiyyətlər digər ölkələr və regionlara da mənfi təsir göstərəcək.
"Əslində, bu qərarın nə kimi təsir göstərəcəyini bilmirəm... Bununla belə, ABŞ-ın İrana qarşı sanksiyaları da daxil olmaqla, əvvəlki bütün sanksiyaları bazarlara və regiona, o cümlədən Türkiyəyə zərər vurdu. Bu sanksiyaların digər ölkələrə və regionlara da müəyyən təsirləri olacaq”, - deyə Bayraktar bildirib.
Türkiyənin yüksək vəzifəli rəsmisinin qeyd etdiyi kimi, onun ölkəsi sabit enerji daşıyıcıları bazarında maraqlıdır.
"İqtisadiyyatlarımızın böyüməsinə ehtiyacımız var. Düşünmürəm ki, bu qərar bu məqsədə çatmağa hər hansı bir yolla imkan verəcək", - Türkiyənin energetika nazirinin müavini deyib.
Ankara dünya bazarında neftin qiymətinin artmağa davam edəcəyini gözləyir.
"Bəli. Bu, sadə riyaziyyatdır - təklif azalarsa, qiymətlər qalxar", - deyə Bayraktar bildirib.
Martın 9-u səhərə neft bazarında vəziyyət
Dünya bazarında neft və qaz qiymətləri son həftələr ərzində çətin geosiyasi vəziyyətin təzyiqi altındadır. Ukrayna ətrafındakı vəziyyət və Rusiya Federasiyasının davam edən hərbi əməliyyatı fonunda çərşənbə axşamı “Brent” markalı neftin qiyməti 2012-ci ildən bəri ilk dəfə bir barel üçün 125 dolları ötüb.
Bir gün əvvəl “Brent” markalı neftin qiyməti qısa müddət ərzində 2008-ci il iyulun 16-dan sonra ilk dəfə bir barel üçün 139,13 dollara çatdı, WTI - 22 sentyabr 2008-ci ildən bəri ilk dəfə olaraq 130 dollara yüksəldi.
Qiymətlər tədricən 11 iyul 2008-ci ildə qeydə alınan rekord səviyyələrə yaxınlaşır.
Çərşənbə günü Moskva vaxtı ilə saat 8:20-də Londonun “ICE Futures” birjasında “Brent” markalı neftin may füçerslərinin qiyməti bir barel üçün 130,87 dollar təşkil edir ki, bu da əvvəlki sessiyanın bağlanış qiymətindən 2,89 dollar (2,26%) çoxdur. Çərşənbə axşamı sövdələşmələr nəticəsində bu sövdələşmələr 4,77 dollar artaraq bir barel üçün 127,98 dollar olub.
Nyu-York əmtəə birjasında (NYMEX) elektron hərraclarda aprel ayı üçün WTI neftinin füçerslərinin qiyməti bu vaxta kimi bir barel üçün 126,06 dollar təşkil edir ki, bu da əvvəlki sessiyanın yekun dəyərindən 2,36 dollar (1,91%) çoxdur. Bir gün əvvəl bu sövdələşmələrin dəyəri 4,3 dollar artaraq bir barel üçün 123,7 dollar olub.
Azərbaycan neftinin qiyməti demək olar ki, 136 dollara çatıb. Dünya bazarında Dünya bazarında “Azeri Light” markalı neftin bir barelinin qiyməti 135,99 dollara satılır (martın 8-də - 128,71 dollar). “Azeri Light” markalı neftin minimum qiyməti 21 aprel 2020-ci ildə 15,81 dollar, maksimal qiyməti 2008-ci ilin iyulunda 149,66 dollar qiymətində müəyyən edilib.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.