BAKI, 23 fevral — Sputnik. Azərbaycanda COVID-19 əleyhinə "AstraZeneca" peyvəndinin istifadəsi dayandırılıb.
Sputnik Azərbaycan APA-ya istinadla xəbər verir ki, bu barədə Respublika Gigiyena və Epidemiologiya Mərkəinin İmmunoprofilaktika şöbəsinin əməkdaşı Əlcəfər Cəfərov "Fəaliyyət üçün məlumat: Effektiv strategiyaların işlənib hazırlanması yolu ilə COVID-19 vaksinlərinin geniş tətbiqinə nail olma" mövzusunda tədbirdə məlumat verib.
Onun sözlərinə görə, bu, dövlət sifarişi ilə bağlıdır.
Qeyd edək ki, indiyədək Azərbaycana 453600 doza "AstraZeneca" vaksini gətirilib.
Azərbaycanda indiyədək məhv edilmiş vaksinin miqdarı açıqlanıb
Əlcəfər Cəfərov bildirib ki, indiyədək məhv edilmiş vaksinlərin miqdarı 507339 dozadır: "Bunlardan 273848 doza "AstraZeneca", 50592 doza "Pfizer", 182898 doza "Sputnik V" peyvəndləri olub".
Əlcəfər Cəfərov qeyd edib ki, respublikada məhv edilən vaksin dozaları ümumi vaksinlərin 4,1 faizini təşkil edir.
O qeyd edib ki, həmçinin humanitar məqsədlə Azərbaycandan peyvənd ixrac olunub. Bu vaksinlərin miqdarı isə 270000 dozadır.
Vaksinasiya olunmuş şəxslərin yaş qrupları üzrə statistikası açıqlanıb
Ə.Cəfərov bildirib ki, 65 və yuxarı yaş qrupunda vaksinasiyadan keçən əhalinin sayı 675961 nəfərdir: "Onlardan 407132 nəfəri I doza, 371771 nəfəri II doza, 272052 nəfəri "buster" doza vurdurub. 50-65 yaş aralığında vaksinasiyadan keçənlərin sayı 1911704 nəfərdir. Onlardan 1301622 nəfəri I doza, 1208724 nəfəri II doza, 889954 nəfəri isə "buster" doza vurdurub. 40-49 yaş aralığında olan 1310947 nəfər peyvənd olunub. Onlardan 892837 nəfəri I doza, 819806 nəfəri II doza, 542277 nəfəri isə "buster" doza vurdurub.
30-39 yaş aralığında olan vaksinasiyadan keçən şəxslərin sayı isə 1775285 nəfərdir. Onlardan 1200257 nəfəri I doza, 1088641 nəfəri II doza, 663151 nəfəri isə "buster" doza üzrə vaksinasiyadan keçib. 18-29 yaş aralığından vaksinasiyadan keçən əhalinin sayı isə 1810622 nəfərdir. Onlardan 1263466 nəfəri I doza, 1109708 nəfəri II doza, 511002 nəfəri isə "buster" doza vurdurub.
İndiyədək vaksinasiyadan keçən əhalinin ümumi sayı isə 10119133 nəfərdir.
O bildirib ki, indiyədək Azərbaycana yeni növ koronavirus (COVID-19) əleyhinə 18 milyon 137 min 790 doza vaksin gətirilib. İndiyədək respublikada 12 milyon 115 min 732 doza "Coronavac", 333 min 607 doza "Pfizer", 9731 doza "AstraZeneca", 8 mim 980 doza isə "Sputnik V" vaksini istifadə olunub. Hazırda ölkədə 4 milyon 882 min 402 doza vaksin ehtiyatı var.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.