BAKI, 11 yanvar — Sputnik, Xalid Məmmədov. İran qonşu ölkələrlə, o cümlədən Azərbaycanla quru sərhədlərini yenidən açır.
Sputnik Azərbaycan APA-ya istinadla xəbər verir ki, bu barədə İranın daxili işlər naziri Əhməd Vahidi məlumat verib.
Ə.Vəhidi deyib ki, koronavirusun omikron ştammına görə 15 gün öncə bağlanan sərhədlər yenidən açılıb və qonşu ölkələrin vətəndaşları İrana gediş-gəliş edə bilərlər.
O qeyd edib ki, İrana səfər üçün qonşu ölkələrin vətəndaşları PZR testi verməlidirlər.
Vəhidi bildirib ki, koronavirusun nəzarətə götürüldüyü bəzi ölkələrdən də hava nəqliyyatı ilə İrana səfər məhdudiyyəti aradan qaldırılıb. Lakin bəzi Avropa ölkələri, o cümlədən Britaniya və Fransadan İrana hava nəqliyyatı ilə səfər hələ ki qadağandır.
Qeyd edək ki, İran 2021-ci il dekabrın 25-dən koronavirusun omikron ştamının yayılması səbəbilə sərhədləri bağlamışdı.