BAKI, 3 yanvar — Sputnik. Ağdam şəhərində tamaşaçı tutumu 30 min nəfərdən çox olan yeni stadion tikiləcək. Yeni stadion əvvəlki yerində - Pənahəli xanın imarət kompleksində deyil, şəhərin digər daha böyük, geniş infrastruktura malik guşəsində inşa ediləcək.
Sputnik Azərbaycan xəbər verir ki, bunu Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov AZƏRTAC-ın bölgə müxbirinə açıqlamasında deyib.
O bildirib ki, hazırda burada layihələndirmə işləri gedir. Bu idman məhəlləsində tək futbol stadionu deyil, müxtəlif idman yarışları üçün qapalı-açıq idman zalları planlaşdırılır.
İdman təmayüllü orta məktəbin, Azərbaycanın digər yerlərindən bura gələcək uşaqlar üçün idman yay düşərgəsinin layihələndirilməsi nəzərdə tutulur.
Qeyd edək ki, 1988-ci ilin son aylarında Ermənistandan və daha sonra Dağlıq Qarabağdan qovulub çıxarılan on minlərlə azərbaycanlı məhz Ağdam şəhərinə pənah gətirib.
1993-cü il iyulun 4-də erməni silahlı birləşmələri artilleriya qurğuları ilə Ağdamı atəşə tutub. Ermənilər Ağdamı bombalayaraq şəhərin əksər hissəsini məhv ediblər. Nəticədə əsgərlər və mülki vətəndaşlar şəhərdən evakuasiya olunub.
23 iyul 1993-cü il tarixdə Ermənistan ordusu tərəfindən Ağdam şəhəri işğal olunub. 20 noyabr 2020-ci il tarixində isə Azərbaycan prezidenti İlham Əliyev, Ermənistanın Baş naziri Nikol Paşinyan və Rusiya lideri Vladimir Putin tərəfindən imzalanmış Üçtərəfli bəyanatın şərtlərinə əsasən Azərbaycan Silahlı Qüvvələri Ağdam şəhərinə daxil olublar.
Bununla da Ağdam şəhərinin işğalına son qoyulub. Azərbaycan hökumətinin planlarına görə, Ağdam ölkənin dördüncü böyük şəhəri olacaq və orada 100 min nəfər yaşayacaq.