BAKI, 31 dekabr — Sputnik. Paytaxtın Sabunçu rayonunda iki yaşlı uşağının oğurlandığını iddia edən ana televiziyaya danışıb. Sputnik Azərbaycan-ın məlumatına görə, Reyhan Şıxəliyeva Xəzər TV-yə açıqlamasında bildirib ki, oğlu dörd övladının gözü qarşısında yaşadığı evdən oğurlanıb:
"İki gün əvvəl işdə olarkən həyat yoldaşım övladımızın oğurlandığını dedi. Dərhal işlədiyim bazardan evə gəldim".
R.Şıxəliyeva iddia edir ki, uşağını oğurlayan qadın əvvəllər onların kirayədə qaldıqları ünvana gələrək həm onlara, həm də ətrafda yaşayanlara sosial yardım veriləcəyi adı ilə siyahıya alıb.
Qadın onu da iddia edir ki, həmin şəxs oğurluğu digər üç uşağın gözü qarşısında həyata keçirib.
Hadisədən sonra uşağın valideynləri ''102'' xidmətinə məlumat veriblər. Hadisə yerinə ərazi üzrə 12-ci Polis Şöbəsinin əməkdaşları gəlib, valideynlərin şikayət ərizəsini alıblar.
Daxili İşlər Nazirliyinin mətbuat xidmətindən bildirilib ki, uşağın tapılması istiqamətində intensiv əməliyyat-axtarış tədbirləri həyata keçirilir.