Sərgi Azərbaycan Mədəniyyət Nazirliyi və İncəsənət Muzeyinin dəstəyi ilə Fransanın Azərbaycandakı səfirliyi və Fransa İnstitutu tərəfindən təşkil olunub.
Sərgidə qeyd olunub ki, Pol Nadar dövrünün ən tanınmış və istedadlı fotoqraflarındandır.
Ekspozisiyaya təxminən 70 fotoşəkil daxildir.
Sərginin kuratoru Könül Rəfiyeva bildirib ki, təqdim olunan şəkillər orijinal neqativlərdən çap olunub.
Bunlar Fransanın Mədəniyyət Nazirliyi yanında Memarlıq və İrs multimedia kitabxanasının fotoarxivi tərəfindən təqdim edilib.
Sərgidə kadrlar üç mövzu üzrə qruplaşdırılıb - "Böyük insanların portretləri", "Bakı" və "Türküstana səyahət".
Çarpayılı vaqonlar və məşhur avropa ekspresləri üzrə ixtisaslaşmış beynəlxalq şirkət 1890-cı illərdə Qafqaz və Orta Asiyaya etnoqrafik ekspedisiya təşkil edib.
Pol Nadar da fotoqraf qismində tura dəvət alıb.
Parisi məşhur "Şərq ekspres"ində tərk edən Nadar avtobusla İstanbula, Batumiyə, Tiflisə, sonra da ilk dəfə olaraq Bakıya gəlir.
Azərbaycanın paytaxtı fotoqrafa xüsusi təəssürat bəxş edir.
Bakıda cəmi yarım gün qalan fotoqraf həmin uzaq günlərin parlaq inikası olan bütöv bir seriya hazırlayır.
Səfəri zamanı fotoqraf şəhərin unikal memarlıq abidələrini, Qoşa Qala qapılarını, Şirvanşahlar sarayını, eləcə də yerli sakinləri lentin yaddaşına köçürür.
Sərgidə həmçinin "Pol Nadarın Bakı səyahəti" adlı qısametrajlı film də nümayiş olunub.
Film üzərində fotoqraf və tarixçi Rüstəm Hüseynov, kurator Könül Rəfiyeva, bəstəkar Araz Özara işləyiblər.
Sərgi 2022-ci il fevralın 15-dək davam edəcək.