BAKI, 13 dekabr — Sputnik. İsraildə "Miss Universe" – 70-ci beynəlxalq gözəllik müsabiqəsi baş tutub. Bu il beş milyon dəyərindəki tac uğrunda 80 ölkədən iddiaçılar yarışıblar.
"Kainat gözəli"nin yubiley müsabiqəsində birinci yeri Hindistan təmsilçisi Harnaaz Sandhu tutub. Beləliklə o, gözəllik müsabiqəsinin bütün tarixi boyunca bu titulu qazanan üçüncü hindistanlı xanım olub.
Qalibə tacı keçənilki kainat gözəli, meksikalı Andrea Mesa təqdim edib. İkinci yerə Cənubi Afrika Respublikasının təmsilçisi Lalela Msvane, üçüncü yerə isə Paraqvay təmsilçisi Nadia Ferera layiq görülüb.
Rusiyanı təmsil edən azərbaycanlı xanım Ralina Arabova müsabiqənin final mərhələsinə çıxa bilməyib.
"Kainat gözəli" – hər il keçirilən beynəlxalq gözəllik müsabiqəsidir. "Dünya gözəli", "Miss International" və "Yer kürəsi gözəli" müsabiqələri ilə birlikdə "Böyük dördlüyə" daxildir. Qərargahı Nyu-Yorkda yerləşir. Müsabiqənin hüquqları 1996-cı ildən 2015-ci ilə kimi Donald Trampa məxsus olub, sonradan o, bu hüquqlarını Hollivud impressariosu Ari Emanuelə satıb.
Müsabiqədə iştirak etmək istəyənlərin yaşı 18-dən aşağı olmamalıdır. Layihəyə hazırlıq müddətindən xanımlara yalnız rəsmi şəkildə ailə qurmaq deyil, həm də vətəndaş nikahında olmaq qadağan edilir. Bundan başqa, müsabiqə iştirakçılarının məhkumluğu, polislə problemi və ya çılpaq foto-sessiyaları olmamalıdır.