BAKI, 10 dekabr — Sputnik. İnvestorların bəzi ölkələrdə COVID-19 ilə əlaqəli məhdudiyyətlərin tətbiqi səbəbindən tələblə bağlı narahatlıqları fonunda neft ucuzlaşıb.
Sputnik Azərbaycan "Report"a istinadən xəbər verir ki, Bakı vaxtı ilə saat 09:22-yə olan məlumata görə, Şimal dənizində hasil olunan "Brent" neftinin fevral fyuçersləri 0,31% ucuzlaşaraq, 1 bareli 74,19 ABŞ dollarına satılıb. WTI neftinin yanvar fyuçerslərinin qiyməti isə 0,23% düşərək, 1 bareli 70,78 ABŞ dolları təşkil edib.
Bazarda müşahidə olunan mənfi dinamika koronavirusun "Omikron" ştamının yayılması səbəbindən bir sıra ölkələrdə əlavə məhdudiyyətlərin tətbiq edilməsi ilə bağlıdır.
ABŞ-ın neft-qaz xidmətləri üzrə ixtisaslaşmış "Baker Hughes Company" şirkətinin ölkədəki fəaliyyətdə olan neft buruqlarının sayı haqqında statistik göstəriciləri də qiymətə təsir göstərə bilər. Belə ki, ötən iş həftəsində ABŞ-da neft buruqlarının sayı dəyişməyib və 467 ədəd təşkil edib.
Nyu-Yorkun NYMEX əmtəə birjasında təbii qaza olan fyuçers kotirovkalarının qiyməti artıb. Yanvarda çatdırmaq şərti ilə təbii qaza olan fyuçerslərin qiyməti 1 mln. BTU-ya (British thermal unit – Britaniya istilik vahidi) görə 0,08% artaraq 3,82 ABŞ dolları təşkil edib.
Həmçinin oxuyun:
Bu il Azərbaycanda qeyri-neft məhsullarının ixracı rekord həddə çatacaq