Samir Qəfərli 1994-cü ildə Ucar rayonunun Bərgüşad kəndində anadan olub. 2001-ci ildə şəhid Ağamusa Mustafayev adına Bərgüşad kənd 1 saylı tam orta məktəbin 1-ci sinfinə gedib. 2012-ci ildə həmin məktəbi əla qiymətlərlə bitirən Samir Azərbaycan Dövlət Mədəniyyət və İncəsənət Universitetinin kulturologiya fakültəsinə qəbul olub.
Təhsil aldığı müddətdə televiziyada yayımlanan “Ata ocağı” serialında aktyor kimi debüt edib. 2019-cu ilin oktyabr ayında həqiqi hərbi xidmətə yollanıb. Ötən il sentyabrın 27-də Vətən müharibəsi başlayanda Samir Qəfərli də döyüşə ilk atılan igidlərimiz arasında idi.
İki bacının bir qardaşı olan Samir işğal altındakı torpaqlarımızı azad etmək üçün döyüşlərdə fəal iştirak edib.
Ölümündən sonra Samir Qəfərli “Vətən uğrunda”, Cəbrayılın, Qubadlının, Laçının azad olunmasına görə, “Hərbi xidmətdə fərqlənməyə” görə medalları ilə təltif edilib.