Sabah, noyabrın 8-də Azərbaycanda "Zəfər Günü" qeyd olunacaq.
Bazar ertəsi Bakıda Vətən müharibəsində qələbənin bir illiyi münasibətilə yürüş təşkil olunacaq.
Yürüş Azneft meydanından Ağ Şəhər bulvarına qədər olacaq.
Həmçinin fləşmob və audiovizual kompozisiyanın videoproyeksiyası olacaq.
Saat 21.10-da Dənizkənarı Bulvarda Azərbaycanın korifey bəstəkarlarının musiqilərinin müşayiəti ilə Zəfər Günü üçün hazırlanan atəşfəşanlıq olacaq.
Artıq bu gündən etibarən Azərbaycan paytaxtının küçələri dövlət bayrağının rənglərinə boyanıb.
Üçrəngli Azərbaycan bayrağı hər yerdə əzəmətlə dalğalanır - evlərin eyvanlarında, avtomobillərin şüşələrində, insanların əllərində və çiyinlərində.
Bu gün demək olar ki, Bakının bütün küçələrində müharibə veteranlarına rast gəlmək mümkündür.
Vətən Müharibəsi iştirakçıları təbrikləri və təşəkkürləri küçədə qəbul edirlər.
Vətəndaşlar həmçinin Azərbaycanın ərazi bütövlüyü uğrunda gedən döyüşlərdə həlak olan şəhidlərin xatirəsini ehtiramla yad edirlər.
Xatırladaq ki, 2020-ci il sentyabrın 27-də Ermənistan silahlı qüvvələrinin cəbhə boyu genişmiqyaslı təxribatına cavab olaraq, Azərbaycan ordusu sonradan "Dəmir yumruq" adlandırılan əks-hücum əməliyyatına başlayıb.
44 gün davam edən Vətən Müharibəsi otuz ilə yaxın davam edən işğala son qoyub və Azərbaycanın ərazi bütövlüyünün bərpası ilə başa çatıb.