BAKI, 29 oktyabr — Sputnik. Azərbaycanın Türkiyədən aldığı avtobusların ölkəyə çatdırılmasına başlanılıb. Sputnik Azərbaycan-ın məlumatına görə, bu barədə Bakı Nəqliyyat Agentliyinin mətbuat katibi Mais Ağayev bildirib.
Onun sözlərinə görə, ölkəmizə avtobusların gətirilməsi 2020-ci ilin dekabrın 10-da Azərbaycan və Türkiyə prezidentlərinin iştirakı ilə təşkil olunan mərasimdə Bakı Nəqliyyat Agentliyi ilə Türkiyənin “BMC Otomativ Sənaye və Ticarət” şirkəti arasında bağlanan müqaviləyə əsasən həyata keçirilir:
“320 ədəd avtobusdan 150 ədədi 12 metrlik, 170 ədədi isə 9 metrlik avtobuslardır. 12 metrlik avtobusların iki mərhələdə gətirilməsi həyata keçirilir. Artıq çatdırılma proseslərinə başlanılıb. Avtobusların çatdırılması istehsalçı şirkətin bizə təqdim etdiyi qrafikə uyğun olaraq həyata keçirilir. Təzə gətirilən avtobuslar xəttə buraxılmayıb”.
Məlumat üçün bildirək ki, 9 metrlik avtobusların gətirilməsi xüsusi ilə daha çox kənd və qəsəbələr üzrə müasir sərnişindaşıma xidmətləri göstərməyə və ətraf qəsəbələrin ictimai nəqliyyata əlçatanlığının artırılmasına imkan verəcək. “Neocity” 9 metrlik avtobuslar geniş manevr imkanlarına malikdir və nisbətən ensiz və dar yollarda rahat hərəkət edir. Avtobusun ümumi sərnişin tutumu 72 nəfərdir və fiziki imkanları məhdud şəxslər üçün əlçatandır. Yeni avtobuslar da Avro 6 standartına uyğun ekoloji baxımdan təmiz sıxılmış təbii qaz (CNG) mühərriklidir.
Qeyd edək ki, 2021-2022-ci illərdə Bakıya 320 yeni avtobusun gətirilməsi nəzərdə tutulub. Məlumat üçün bildirək ki, son 5 ildə ölkə başçısının tapşırıqlarına uyğun olaraq 724 ədəd orta və iri tutumlu avtobuslar alınaraq, marşrut şəbəkəsində istismara buraxılıb. Onların da 415 ədədi BMC şirkətinin istehsalıdır. Yeni avtobusların alınması ilə bu rəqəm 735-ə yüksələcək.