BAKI, 26 oktyabr — Sputnik. Dövlət Məşğulluq Agentliyi "CV yarat" platformasını istifadəyə verib. DMA-dan Sputnik Azərbaycan-a verilən məlumata görə, agentlik tərəfindən www.cvyarat.az platforması istifadəyə verilib.
Bu platforma vasitəsi ilə CV hazırlamaqda çətinlik çəkən şəxslər platformada qeydiyyatdan keçməklə lazımi xanalara məlumatlarını əlavə edib, qısa müddətdə öz CV-sini PDF formatında əldə edə biləcək.
Platformadan istifadə bütün hədəf qrupları üçün nəzərdə tutulub. Məqsəd CV hazırlığında əlçatanlığın təmin olunması, daxil edilən məlumatların dolğun və düzgün olmasını təmin etmək və nəticədə işsiz və işaxtaran şəxslərin işəqəbul prosesinə dəstək olmaqdır.
Yaxın zamanda www.cvyarat.az platforması digər elektron sistemlərə də inteqrasiya olunacaq və identifikasiya nömrəsini yazmaqla istifadəçiyə dair şəxsi məlumatlar, eləcə də təhsil, iş təcrübəsi kimi məlumatlar birbaşa doldurulacaq.
Platformadan istifadə ödənişsizdir.