BAKI, 18 oktyabr — Sputnik. "Azərbaycan son illər Gürcüstanın əsas ticari tərəfdaşlarının ilk beşliyinə daxil olub, cari ilin göstəricilərinə əsasən isə 4-cü yerdə qərarlaşıb".
Sputnik Azərbaycan "Report"a istinadən xəbər verir ki, bunu Gürcüstanın iqtisadiyyat və dayanıqlı inkişaf naziri Natia Turnava deyib.
Nazir bildirib ki, koronavirus pandemiyasından öncə Azərbaycan Gürcüstanda vacib investor olub.
"Azərbaycanın sərmayələri Gürcüstan iqtisadiyyatının nəqliyyat və rabitə, tikinti, energetika, emal, səhiyyə və turizm kimi sahələrinə yönəldilib. Azərbaycan bizim həm ticarət, həm də investisiyalar baxımından əsas strateji tərəfdaşlarımızdan biridir".
N.Turnavanın sözlərinə görə, iki ölkə Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Bakı-Tbilisi-Qars dəmir yolu, Cənub Qaz Dəhlizi kimi regional energetika və nəqliyyat layihələrində məhsuldar əməkdaşlıq edir: "Bu layihələr yalnız Cənubi Qafqaz bölgəsinin inkişafı üçün deyil, daha geniş anlamda Avrasiya bölgəsi, həmçinin ümumi sabitlik və təhlükəsizlik üçün mühüm əhəmiyyət kəsb edir".
O qeyd edib ki, Gürcüstan və Azərbaycanın iştirakçısı olduğu birgə layihələr əhəmiyyəti baxımından unikaldır: "Biz bundan sonra da layihələrin tam şəkildə fəaliyyət göstərməsi və inkişafına fəal olaraq töhfə verməyə hazırıq. Diqqətəlayiqdir ki, bu layihələr bizim ölkələrin suverenliyinin təminatında və bizim dəhlizin önəminin artırılmasında əhəmiyyətli rol oynayıb. Gürcüstan Azərbaycanla həm cari, həm də planlaşdırılan nəqliyyat və energetika layihələrinin reallaşdırılmasında münasibətlərin dərinləşdirilməsinə hazırdır".
Gürcü nazir Azərbaycan xalqını Müstəqilliyin Bərpası Günü münasibətilə də təbrik edib: "Mənim üçün Gürcüstana qardaş dövlət olan Azərbaycanı əlamətdar tarix – Müstəqilliyinin Bərpası Günü münasibətilə təbrik etmək böyük şərəfdir. Ölkələrimiz arasında tarixən mövcud olan sıx dostluq əlaqələri unikallığı ilə seçilir. Əminəm ki, Gürcüstan və Azərbaycan arasında yüksək səviyyədə strateji və mehriban qonşuluq münasibətləri bundan sonra da hər iki xalqın rifahı naminə möhkəmlənəcək. Azərbaycan xalqını bir daha təbrik edirəm, sülh və çiçəklənmə arzulayıram".
Eləcə də oxuyun:
* Gürcüstan XİN: Azərbaycanla imzalanan sənədlər regionda sülh və sabitliyə töhfə verəcək
* Azərbaycan, Türkiyə və Gürcüstanın müdafiə nazirləri birgə bəyanatla çıxış ediblər
* Kamran Əliyev Gürcüstanın Baş naziri ilə görüşüb
* Azərbaycan, Türkiyə və Gürcüstan parlamentarilərinin görüşü keçiriləcək