BAKI, 8 oktyabr — Sputnik. Bu gün Balakənin Mahamalar kəndində qonur ayı balaları görünüb. Görüntülərdən də aydın olur ki, ayılar avtomobillərin qarşısı ilə küçə boyu qaçırlar.
Sputnik Azərbaycan xəbər verir ki, AMEA-nın Zoologiya İnstitutunun əməkdaşı Elşad Əsgərov "Qafqazinfo"ya hadisə barədə açıqlama verib.
O bildirib ki, ayı balaları bu gün səhər saatlarında görünüb. Hər iki qonur ayı baladır və bu vaxtlar qış yuxusuna getməyə hazırlıq üçün dağdan kəndə eniblər: "Maşınlar bu heyvanları qabağına qatıb qovlayırlar. Əslində onlar bu heyvanlara dəyməsələr, özləri çıxıb gedəcəklər. Ayılar qış yuxusundan əvvəl daha çox karbohidrat qidasına keçirlər, çünki şirəli meyvələri yeyəndə bədəndə piyə çevrilir və qış yuxusuna gedirlər. Balakəndə çoxlu bağlar var, hətta şabalıdı da yağlanmaq üçün yeyirlər. Ona görə də kəndlərə yaxın yerlərə gəlirlər".
E.Əsgərov həmçinin bildirib ki, ayı balalarının birinin meşəyə getdiyi müşahidə olunub, digərindən isə hələ xəbər yoxdur.