"Oradan da biz Kərbəlaya getmişik. Sentyabrın 27-də Kərbəlaya daxil olmuşuq. Orada da ziyarət edəndən sonra gəldiyimiz yolla geri qayıtmalıydıq. Amma tur agentliyin əməkdaşı olan Xəyyam adlı şəxs bizi getdiyimiz yolla yox, İraq-İran gömrük postu ilə Nehrəm postuna gətirdi. Biz qrup başçısına bildirdik ki, gəldiyimiz yolla geri qayıtmalıyıq. Xəyyam bizə bildirdi ki, hər şey danışılıb, qaydasında olacaq. 62 nəfəri göndərdi İran-Astara gömrük postuna. İran tərəfi bizi buraxdı. Amma özümüzün Astara gömrük postu bizi Azərbaycana buraxmır ki, ölkəyə giriş kodunuzu təqdim edin. İndi biz Xəyyam adlı şəxslə əlaqə saxlaya bilmirik. Halbuki, zəvvarbaşı İmam Hüseyn zəvvarlarına xidmət etməlidir. Azərbaycan gömrük postu deyir hansı ölkə ilə gəlmisiniz o yolla da geri qayıdın. Bizim üstümüzdə isə bir qəpik belə, pulumuz qalmayıb. Kimin ki, pulu vardı, onlar Culfaya qayıdıb oradan Naxçıvana keçiblər. 40-a qədər zəvvar isə İranla Azərbaycan arasında olan Astara gömrük postunda yağışın, soyuğun altında qalıb".
"Səkkiz avtobus zəvvar pul ödəyərək ziyarətə gedib. Bizə həmin tur şirkəti bildirdi ki, yol məsrəfini də özləri ödəyəcək. Amma bizim bu ziyarətə 1200 manatdan çox pulumuz çıxıb. İraqın küçələrində ehsan yeməklə dolanmışıq. Azərbaycandan Türkiyəyə keçmək üçün COVID-ə görə analiz xərclərini də özümüz ödəmişik. İndi pulsuz-parasız qalmışıq Astara keçid məntəqəsində. Nə mobil telefonumuzda danışıq limiti, nə də internet yoxdur ki, yaxınlarımızla əlaqə saxlayaq".