BAKI, 28 sentyabr — Sputnik. COVID-19 zamanı mədə-bağırsaq traktına aid simptomlara daha çox rast gəlinir. Bu barədə RİA Novosti-yə Rospotrebnadzor Mərkəzi Elmi Tədqiqat Epidemiologiya İnstitutunun klinik tədqiqatlar şöbəsinin müdiri Xədicət Ömərova bildirib.
"Koronavirus infeksiyası olan xəstələrdə edilən 35 tədqiqatın metaanalizinin nəticələrinə görə, mədə-bağırsaq traktının simptomlarının ümumi yayılması 15%-dir və bunlardan ən çox rast gəlinənləri ürəkbulanma, qusma, diareya və iştahsızlıqdır", - deyə mütəxəssis bildirib.
Eyni zamanda Ömərova bildirib ki, hər onuncu xəstədə xəstəliyin başqa təzahürləri olmaya bilər.
Həkim epidemiyanın ikinci dalğası zamanı COVID-19-un mədə-bağırsaq təzahürlərinin daha tez-tez baş verməyə başladığını da qeyd edib. Hər şeydən əvvəl, bu virusun mutasiyaları ilə əlaqədardır.
Ömərova izah edib ki, COVID-19 zamanı həzm orqanlarının zədələnməsi sistemli iltihab və mikrosirkulyasiya pozğunluğu səbəbindən mədə-bağırsaq traktının selikli qişasının təsirinin artmasına səbəb olur.
Onun sözlərinə görə, hazırda mədə-bağırsaq traktının tənəffüs orqanları ilə birlikdə koronavirusun "giriş qapısı" kimi xidmət edə biləcəyi hipotez nəzərdən keçirilib.
"Xlorid turşusu qida ilə birlikdə daxil olan bakteriya və virusları məhv edir və onların daha da nüfuz etməsinə mane olur. Mədənin normal turşuluğu pH 0,8-1,5-dir. Müqayisə üçün limonun pH-ni göstərmək olar ki, bu da 5,0-ə bərabərdir. Bu o deməkdir ki, mədəmizdəki turşuluq limon şirəsindən daha turşudur. Gün ərzində sağlam mədə 2,5 litr konsentratlaşdırılmış xlorid turşusu istehsal edir. Mədədəki turşuluq yalnız mədədə iltihablı proseslərin inkişafı və ya stresli hallarda azala bilər", - deyə Ömərova yekunlaşdırıb.
Bu yaxınlarda braziliyalı alimlər qastroezofageal reflüks (QERX) və Barret kimi qida borusu xəstəliklərində mədə və həzmdə yaranan turş mühitin koronavirusun aktivliyi ilə artdığını müəyyən ediblər. Bunun səbəbi ondan ibarətdir ki, pH dəyəri azaldıqda virusun hüceyrələrə daxil olmaq üçün istifadə etdiyi ACE2 reseptorunun ekspressiyası artır.