BAKI, 7 sentyabr — Sputnik. Ermənistanın sabiq Baş Prokuroru və Ermənistan İstintaq Komitəsinin sabiq rəhbəri Avqan Ovsepyan saxlanılıb. Sputnik Azərbaycan xəbər verir ki, bu barədə məlumatı Ermənistan Xüsusi İstintaq Komitəsi (XİK) yayıb.
Ermənistan XİK-in məlumatına görə, Ovsepyan Baş Prokuror olduğu vaxt 2004-2013-cü ildə, həmçinin 2014-2018-ci ildə İstintaq Komitəsinin rəhbəri olduğu vaxtda faktiki olaraq sahibkarlıq fəaliyyəti ilə məşğul olan bir sıra şirkətlərin idarəetməsində iştirak edib.
Bundan əlavə, istintaqın versiyasına görə, Ovsepyan çox böyük həcmdə (190 milyon dram və ya 385 min dollar) rüşvət alıb, həmçinin 800 milyon dram (1,6 milyon dollar) həcmində mülkü oğurlayıb.
Ovsepyan həmçinin çirkli pulları yumaqda da ittiham olunub.
Bununla da sabiq baş prokuror qanunsuz sahibkarlıq fəaliyyəti, rüşvətxorluq, dələduzluq və çirkli pulların yuyulması maddələri ilə ittiham olunub.