BAKI, 27 avqust — Sputnik. Qazaxıstanın cənubundakı hərbi hissədə silah anbarında baş vermiş partlayışla bağlı hadisənin şahidi danışıb. Sputnik Azərbaycan bu barədə "RİA Novosti"yə istinadla xəbər yayıb. Hadisənin baş verdiyi Taraz şəhərinin sakini Nadejda bildirib ki, axşamdan xeyli keçmiş əvvəl partlayış səsi eşidilib, ardınca isə səmada qığılcımlar görünüb. Bununla belə, qadın evini atıb getmək barədə fikirləşmədiyini deyib.
"Axşam saat 10 radələri idi (Bakı vaxtı ilə təxminən 19:00-red.), partlayış səsi eşitdik, sonra səmada işıq yanıb söndü. Yoldaşım dedi ki, yəqin haradasa evlərdən birində qaz partlayışı olub. Sonra yenə partlayış səsləri gəlməyə başladı. Nə olduğunu anlaya bilmədik. Tez həyətə düşdük, bizdən sağ tərəfdə göyün üzünü qırmızı işıq bürümüşdü. Biz oradan uzaqda yaşayırıq, demək olar ki, şəhərin o biri başında", – deyə Nadejda RİA Novostiyə danışıb.
Daha sonra qadın nəvəsindən partlayışın silah anbarında baş verdiyini öyrənib. Nadejda onu da bildirib ki, hazırda şəhərdə sakitlikdir, yalnız çoxlu sayda polis və yanğınsöndürən var.
Qeyd edək ki, avqustun 26-da axşam saatlarına Qazaxıstanın Jambılsk vilayətinin Taraz şəhəri yaxınlığındakı hərbi hissədə güclü partlayış olub. Ölkənin Müdafiə Nazirliyindən məlumatı təsdiqləyərək bildiriblər ki, hərbi hissənin anbarında, əsasən, hərbi mühəndis sursatı saxlanır, onların partlayış zamanı ətrafa yayılma radiusu isə elə də böyük olmur.
Müdafiə Naziriyinin məlumatına görə, hadisə nəticəsində 5 nəfər həlak olub. Qazaxıstan Fövqəladə Hallar Nazirliyindən verilən son məlumatda isə xəstəxanalara xəsarət almış 90 nəfərin yerləşdirildiyi və onların 49-nun yerli FH departamentinin əməkdaşları olduğu bildirilib. Yaralıların 6-nın vəziyyəti ağırdır.
Fakt üzrə Qazaxıstan Cinayət Məcələsinin müvafiq maddəsi ilə cinayət işi qaldırılıb. Ətraf kəndlərin sakinləri təxliyə olunublar. Hadisə yerində yanğın davam edir.