Kabildən təxliyə davam edir. Əfqanıstandakı vəziyyətlə bağlı nə məlumdur?

Əfqanıstanda hakimiyyəti ələ keçirən Taliban* hərəkatı Kabildə ibadət mərasimi ilə başlayan ilk mətbuat konfransını keçirib. Jurnalistlər qarşısında çıxış edən hərəkatın mətbuat katibi Zabihulla Mücahid Qurandan müəyyən surələr oxuyandan sonra ölkədə Amerika işğalının başa çatması münasibətilə bütün əfqanları təbrik edib.

Taliblər bəyan ediblər ki, dünyada heç bir ölkəyə qarşı düşmənçilik münasibəti göstərmək istəmirlər. Mücahidin sözlərinə görə, ölkədəki bütün səfirliklər və QHT-lər tam təhlükəsizlik altındadır.

Taliban*, həmçinin bəyan edib ki, ölkə ərazisindən digər dövlətlərə hücum bazası kimi istifadə olunmasına yol verməyəcək.

Mücahid bildirib ki, ölkədə qadınların hüquqları müdafiə olunacaq, onlara şəriət çərçivəsində aktiv həyat tərzi keçirmək imkanı yaradılacaq. O, həmçinin bildirib ki, qadınlardan üzü açıq saxlayan hicab geyinmələri tələb olunacaq. Mücahidin sözlərinə görə, Əfqanıstanda minlərlə məktəb öz işini davam etdirir, ölkədə həyat öz axarına düşməyə başlayıb.

Mücahid bəyan edib ki, Talibanın* formalaşdırdığı Əfqanıstan hökuməti ölkənin əvvəlki iqtidarından daha yaxşı işləməyə qadirdir.“Bu, güclü İslam dövləti olacaq, sizi buna əmin edə bilərəm. Bu dövlət bizim dəyərlərimizi müdafiə edərək xalqımıza xidmət edəcək”, – deyə Mücahid vəd verib.
Bu arada, taliblər Kabildə buraxılış-nəzarət məntəqələri şəbəkəsi yaradıblar. Ölkə sakinləri və əcnəbilər isə əvvəlki kimi aeroporta can atırlar. Taliblər ölkədən getmək istəyənlərə hücum etməyəcəklərini bildiriblər.
* Rusiya Federasiyasında qadağan olunmuş terror qruplaşması