Yola saldığımız həftə təbiətin şıltaqlıqları baxımından təlatümlü keçdi. Türkiyədə, Yunanıstanda, Əlcəzairdə, ABŞ-da meşə yanğınları ilə yanaşı, bəzi dövlətlərdə - Hindistanda, Çində, hətta elə Türkiyənin özündə, güclü yağışlar daşqınlara, insan ölümlərinə səbəb oldu.
Ötən həftəni idman azarkeşləri də unutmayacaqlar: İspaniyanın "Barselona" klubunun ulduzu Lionel Messi qəflətən komandadan ayrıldı. Göz yaşları ilə.
İdman demişkən, onu heç bir müharibə təxirə sala bilməz. Məsələn, Suriyadakı qaçqın düşərgəsində uşaqlar özləri "Olimpiya oyunları" keçirirlər.
Koronavirus pandemiyası səbəbindən maskalanan dünyada başqa əyləncələr, insan ayağı dəyən və dəyməyən yerlərdə məxsusi gözəlliklər də var.
Dünya xəbər agentliklərinin fotojurnalistləri tərəfindən çəkilən yaddaqalan hadisələri və emosional anları Sputnik Azərbaycan-ın həftəlik fotokolleksiyasında izləməyə dəvət edirik.