BAKI, 16 iyun — Sputnik. Şəmkir şəhərinin kənarında hündür təpələrin birinin üzərində çox yerdən görünən ürək və içindən keçən ox fiquru yer alır. Təxminən 35-40 kvadratmetr ərazini əhatə edən bu fiqur dağın döşünə daşlardan istifadə edilərək düzülüb və sonradan üzərinə ağ boya çəkilib.
Sputnik Azərbaycan-ın bölgə müxbiri İlham Mustafayev bu ürəyin oraya neçə çəkilməsi ilə maraqlanıb.
Ətraf ərazidə yaşayanlar bu fiqurun Şəmkir şəhər sakini Elbrus Hüseynov tərəfindən hazırlandığını bildiriblər. Gənc öz sevgisini izhar etmək üçün sevdiyi qızın evlərindən də görünən yerdə bu fiquru düzəldib. Lakin bir il sonra avtomobil qəzası nəticəsndə dünyasını dəyişib.
E.Hüseynovun yaxın qohumu Ülvi Hüseynov Elbrusun öz sevgisini bu yolla etiraf etdiyini danışıb:
"Fiquru bibim oğlu 2015-ci ildə çəkib dağa. Onda Elbrusun 17 yaşı olub. Bir qızı sevirdi. Sevgisini bu yolla etiraf etmişdi. Lakin 2016-cı ildə avtomobil qəzasında rəhmətə getdi. Biz isə onun hər doğum günündə hazırladığı əl işinə gəlib baş çəkirik, qopan daşları səliqəyə salırıq, yağış yuyan rənglərini isə yeniləyirik".
Bu fiqur şəhərətrafı yolun və Gədəbəy yolunun üzərində yerləşdiyindən buradan keçən hər kəsin marağına səbəb olur. O, eyni zamanda Şəmkirin bir çox hissəsindən də görünür.