BAKI, 22 may — Sputnik, Zülfiyyə Quluyeva. "Aprel və may aylarında 9 nəfəri ilan sancıb". Bu barədə Sputnik Azərbaycan-a Klinik Tibbi Mərkəzin Toksikologiya şöbəsinin müdiri, baş toksikoloq Azər Maqsudov məlumat verib.
O bildirib ki, Klinik Tibbi Mərkəzin Toksikologiya şöbəsinə ilan sancması ilə bağlı müraciət edənlərin 1 nəfəri uşaq olub: "Aprel ayında ilan sancması ilə bağlı bizim şöbəyə bir müraciət daxil olub. May ayında isə 8 nəfər ilan sancması ilə bağlı müraciət edib. Müraciət edənlərin hər biri xəstəxanaya yerləşdirilib. Xəstəxanaya yerləşdirilənlərdən 1 nəfər istisna olmaqla qalanlarının səhhəti normal olduğundan ilkin tibbi yardımdan sonra evə buraxılıblar. Kliniki Tibbi Mərkəzin Toksikologiya şöbəsində ilan sancması ilə bağlı nə ötən il, nə də ki bu il ölüm hadisəsi baş verməyib".
A.Maqsudovun sözlərinə görə, ilan sancması ilə daxil olan müraciətlərin bir qismi Bakı ətrafı kənd və qəsəbələrin payına düşür: "İlan sancma Bakının əsasən Zirə, Qaraçuxur, Qobu və Güzdək ərazilərində qeydə alınıb. Rayonlardan isə Qəbələ və Şamaxıda ilan sancması qeydə alınıb”.
A.Maqsudovun sözlərinə görə, ilan sancması halları əsasən həyətyanı sahələrdə qeydə alınıb. Amma Klinik Tibbi Mərkəzin Toksikologiya şöbə müdiri bu cür halların havalar istiləşdikcə əkin sahələrində də qeydə alınmasının istisna olmadığını bildirib.
Eləcə də oxuyun:
* Azərbaycanda kişini başından ilan sacdı - Vəziyyəti ağırdır
* Qazaxda nadir hadisə: Arıçı arı sancmasından keçinib