BAKI, 25 aprel - Sputnik. Bağdad şəhərində koronaviruslu pasiyentlərin müalicə aldığı xəstəxanada baş verən yanğında ölənlərin sayı 90-a yüksəlib.
Sputnik Azərbaycan bildirir ki, bu barədə Al-Arabia telekanalı öz mənbələrinə istinadən xəbər verir.
İraqın Daxili İşlər Nazirliyi bir qədər öncə "Əl-Xətib" xəstəxanasında ölənlərin sayının 82, xəsarət alanların isə 110 nəfər olduğunu açıqlamışdı. KİV-in məlumatına görə, yanğına oksigen balonunun partlaması səbəb olub. Ölümlərin əksəriyyəti isə dəm qazından boğulmadan baş verib.
İraqın Baş naziri Mustafa Əl-Kazımi ölkənin səhiyyə naziri ilə Bağdadın merini işdən çıxararaq onlar haqda araşdırma başladılmasını istəyib. Bağdaddakı xəstəxanda həlak olanların ailələrinin hərəsinə 10 milyon İraq dinarı (təxminən 7 min ABŞ dolları) veriləcək.