BAKI, 8 aprel — Sputnik. Böyük Britaniya kraliçası II Yelizaveta krallığın tarixində ilk dəfə baş verəcək yeniliyə imza atıb. "CNN Türk"ün yaydığı xəbərə görə, kraliçanın qərarı ilə Bukinhem sarayının darvazaları piknik keçirilməsi üçün xalqın üzünə açılacaq.
Məsələ ilə əlaqədar Bukinhem sarayından rəsmi açıqlama da verilib. Açıqlamada "Bu yay Bukinhem sarayının bağçası ziyarətçilərin üzünə açıq elan olunur. Sarayın çəmənliklərində piknik etmək üçün həyatınız boyunca yalnız bircə dəfə qarşılaşa biləcəyiniz bu fürsəti dəyərləndirin", – deyə qeyd olunur.
Qeyd edək ki, Bukinhem sarayı 775 otaqdan ibarət 828 min kvadratmetr əraziyə sahibdir. Kral ailəsinin veb saytında yer alan məlumata görə, sarayda müxtəlif tədbirlər üçün istifadə olunan 19 dövlət otağı var. Bundan başqa, sarayda 240 yataq otağı mövcuddur ki, onlardan 52-si kral otaqlarıdır, qalan 188-i isə işçilərin istifadəsi üçün nəzərdə tutulub.
Sarayın bağında çiçəklər və yaşıllıqlarla dolu 156 metrlik sərhəd divarı mövcuddur. Bağda göl, tennis kortu da var. Ümumiyyətlə, Bukinhem sarayı dünyanın ən böyük və ən dəbədbli sarayları arasında 14-cü yeri tutur.