BAKI, 30 mart — Sputnik. Azərbaycanın Xalq artisti, tanınmış teatr, kino və televiziya rejissoru Ramiz Həsənoğlunun 75 illik yubileyi ilə bağlı film çəkilir.
Sputnik Azərbaycan xəbər verir ki, AzTV-nin Sosial media və ictimaiyyətlə əlaqələr şöbəsinin məlumatına görə, bu, R.Həsənoğlunun yubileyinə Azərbaycan Televiziyasının hədiyyəsidir. Şərti adı "Uzun yolun bələdçisi" olan filmin rejissoru Elnur Məmmədov, ssenari müəllifi isə Afaq Vasifqızıdır. Filmdə Ramiz Həsənoğlunun bir zamanlar TV, teatr, kino işlərində yer alan obrazlar – Topal Teymur, Salman bəy, Zəhra xalaqızı, Müşkünaz xanım, Mirzə Fətəli bir araya gələcəklər. Lakin bu dəfə yeni ampluada.
Rejissorun ən yadda qalan qəhrəmanlarını elə onları yaradan aktyorlar – Cahangir Novruzov, Afaq Bəşirqızı, Məbud Məhərrəmov, Elman Rəfiyev, Hacı İsmayılov, Dilarə Əliyeva, Rasim Balayev, Məmməd Səfa, İlham Namiq Kamal və digərləri canlandıracaqlar. Ramiz Həsənoğlunun həyatından da parçaların nümayiş olunacağı filmin çəkilişləri hazırda davam edir.
Məlumat üçün bildirək ki, R.Həsənoğlu 13 aprel 1946-cı ildə anadan olub.