BAKI, - 12 mart - Sputnik. Bakıda küləklərin getdikcə çoxalması dünyada baş verən qlobal iqlim dəyişmələri ilə əlaqədardır. Bu təbiət hadisəsi getdikcə daha da artacaq və onların həm tezliyinin, həm də amplitudunun (gücünün) artması gözləniləndir.
Sputnik Azərbaycan-ın məlumatına görə, bunu AMEA akademik H.Ə.Əliyev adına Coğrafiya İnstitutunun direktoru, akademik Ramiz Məmmədov ARB kanalında külək və onun fəsadları haqqında danışarkən deyib.
Akademikin sözlərinə görə, küləyin fəsadları təkcə evlərin dam örtüklərinin uçması, ağacların aşması kimi hallarda özünü göstərmir, bu fəsadlar açıq dənizdə gəmilərin hərəkətində, neftçilərin fəaliyyətində, tikintidə daha kəskin şəkildə özünü büruzə verir. Xalq arasında “qara yel” deyilən güclü külək əkin sahələrində bitkilərin məhvinə də səbəb ola bilər.
“Bəs küləyin fəsadlarından necə qorunmalı?” sualına alim: “Ondan qorunmaq yox, ona adaptasiya olunmaq lazımdır, insanlar belə hadisələrin istənilən an baş verə biləcəyini nəzərə almalı, həmişə hazırlıqlı olmalıdırlar”, - cavabını verib.