Rahim Məmmədov, Sputnik Azərbaycan
BAKI, 10 mart — Sputnik. Kür çayı Mingəçeviri iki hissəyə ayırır. Buranın yayı isti, qışı mülayim keçir. Mingəçevir daha çox energetiklər şəhəri kimi tanınınır. Burada yerləşən Azərbaycan İES demək olar ki, ölkənin yarıdan çoxunu elektirik enerjisi ilə təmin edir. "Nur şəhəri" son illər turizm bölgəsi olaraq da, həm yerli, həm də xarici turistlərin diqqətini çəkə bilib. Pandemiyadan öncə, ərəblər, ruslar, almanlar bu şəhərə istirahət üçün üz tuturdular. Müxtəlif ölkənin avarçəkənləri Kür Olimpiya Tədris İdman Mərkəzində təlim-məşq toplantıları keçirdilər.
Mingəçevirdə univeristet, kollec, fabrik və digər istehsal müəssələri olduğundan, buraya digər bölgələrimizdən gələnlər də az deyil. Hazırda şəhər əhalisinin sayı 106 mindən çoxdur. İnsanlar artıqca, burada məskunlaşanlar da günbəgün artır. Bu səbəbdən mənzil sahibi olmaq istəyənlər də çoxdur. Təmiz, səliqəli, sakit şəhərdə ev almaq istəyənlər artdığından qiymətlər də bahalaşıb. 70 yaşlı şəhər sakini İslam Şirinov övladı üçün yeni mənzil almaq istəsə də, bahalaşma onun istəyinə mane olub:
"Bizim şəhərdə evlərin qiyməti həddindən artıq yüksəlib. İpotekaya da çox adamın gücü çatmır. Mingəçevir kimi şəhərdə əmək haqqı 300-400 manatdı. İpoteka almaqdan ötrü aşağısı gərək 700-800 manat əmək haqqın ola. Belə görünür ki, imkansız təbəqəyə ev almaq gələn perspektivdə mümkün olmayacaq".
Şirinovun sözlərinə görə, Mingəçevirdə satışda iki cür evlər var: "Leninqrad" və "Xruşşovka" deyilən çoxdan tikilən binalardakı mənzillər. "Leninqrad" tiplilər bahadır, bir otaqlısı 25-30 minə qalxıb. Çünki birotaqlıları ikiotaqlıya da çevirib mətbəxi eyvana çıxarmaq olur. "Xruşşovka"-lardakı təmirsiz birotaqlı evi isə 25 min manata tapmaq olar. "Ayrı cür mümkün deyil, tələbat çoxdur. Amma hamı ala bilmir.", - deyə o, bildirib.
Mingəçevirdə rieltor xidmətində çalışanlar da qiymətlərin artdığını təsdiqlədilər. Uzun illərdir bu sahədə çalışan Aydın Heydərov Sputnik Azərbaycan-ın müxbirinə bildirib ki, şəhərdə ipoteka krediti ilə satış xeyli canlanma yaradıb.
"Binalarda 1-2 otaqlı mənzillər bahalaşıb. Ötən illə müqayisədə 5-6 min manat fərq var. Buna səbəb də ipoteka kreditinin verilməsi oldu. Bu, çox gözəldi. Ona görə də alqı-satqıda canlanma var. Banklar tərəfindən ipoteka krediti verilməsəydi, inandırım sizi, evlərin qiyməti 30 faiz düşəcəkdi. Artım daha çox bina evlərində müşahidə edilir, torpaq sahələrinin isə qiyməti stabildi, artım yoxdu. Onu da deyim ki, həyət evləri nisbətən ucuzlaşıb."
Şəhərdə rieltor fəaliyyəti göstərən Vüqar Yusifov da artımın olduğunu bildirdi. Amma o, bəzi ev sahiblərinin qiymətləri fantastik həddə qaldırmasını da gizlətmədi:
"İpotekaya görə ev alanlar çoxdur, müştəriyə ürəyi istəyən kimi ev vermək olmur. Amma fantastik qiymətlər deyən ev sahibləri də olur. Məsələn, baxırsan ki, evin dəyəri 90 mindir, amma onu 100 min manata deyir. Biz də görürürük ki, bu, real qiymət deyil, ev sahibi onu süni şəkildə artırıb. Alıcı da götür-qoy edir, fikirləşir ki, bina evinə bu qədər pulu verməkdənsə, həyət evi tikdirmək daha sərfəlidir. Həyət evləri indi ucuzlaşıb. Kirayədə qalmaq istəyənlər də yaxşı şəraiti olan evlər axtarırlar."
Ev-alqı satqısı ilə məşğul olanlar bildirir ki, daha çox müştərilər şəhər mərkəzində mənzil almağa can atırlar. Onu da qeyd edək ki, hazırda Mingəçevirdə kirayə və torpaq alqı-satıqısı ilə məşğul olanların fəallığı o qədər də müşahidə edilmir.