BAKI, 9 mart — Sputnik. Koronavirus əleyhinə Rusiyanın "Sputnik V" peyvəndi bu ilin iyul ayından İtaliyada istehsal olunacaq. Sputnik Azərbaycan "Euronews"a istinadən xəbər verir ki, bu barədə İtaliya – Rusiya Ticarət Palatasının yaydığı məlumatda bildirilir.
Bununla da İtaliya Rusiya vaksinini istehsal edəcək ilk Avropa İttifaqı (Aİ) ölkəsi olacaq.
"Vaksin 2021-ci ilin iyul ayında İtaliya – İsveçrə əczaçılıq şirkəti olan "Adienne"nin Lombardiya vilayətində yerləşən müəssisələrində istehsal olunacaq", - deyə Ticarət Palatasının mətbuat katibi Stefano Maggi bildirib.
O qeyd edib ki, iyul ayından 2022-ci ilin yanvar ayının birinə qədər on milyon doza istehsal olunacaq.
Xatırladaq ki, Sputnik V hələ Avropa Tibb Agentliyi (EMA) tərəfindən təsdiqlənməyib. Rusiya rəsmiləri isə öz növbəsində qeyd ediblər ki, iyun ayından 50 milyon avropalı üçün vaksin tədarük etməyə hazırdırlar.
Qeyd edək ki, fevralın 2-si "The Lancet" elmi jurnalı "Sputnik V" koronavirusa qarşı peyvənd preparatının klinik sınaqlarının üçüncü mərhələsinin nəticələrini dərc edib.
Klinik sınaqların üçüncü mərhələsində "Sputnik V" yüksək effektivlik, immunogenlik və təhlükəsizlik göstəriciləri nümayiş etdirib.
Həm peyvənd, həm də plasebo vurulmuş 19 866 könüllünün analiz təhlilləri göstərir ki, hər iki dozadan sonra peyvəndin effektivliyi 91,6 faiz təşkil edir. Preparat vurulandan sonra yalnız 78 koronavirusa yoluxma hadisəsi öz təsdiqini tapıb.
Müqayisə üçün bildirək ki, "AstraZeneca"nın effektivliyi - 62,1%, "Sinovac" peyvəndinin - 50,4%, "Sinopharm"ın - 79,3% təşkil edir.
Tədqiqatın vacib bir hissəsi də 60 yaşdan yuxarı könüllülərin sınaqlarda iştirakı ilə bağlı idi (peyvənd qrupunda ən yaşlı iştirakçının 87, plasebo qrupunda isə 84 yaşı olub). Yaşlılar üçün təhlükəsizlik göstəriciləri yüksək olub. 60 yaşdan yuxarı 2144 könüllü üçün effektivlik 91,8% təşkil edib ki, bu da 18-60 yaş arası könüllülər qrupunda əldə edilən məlumatlardan statistik olaraq fərqlənmir.
Qeyd edək ki, Rusiya Səhiyyə Nazirliyi "Sputnik V" peyvəndini 2020-ci ilin avqust ayında qeydə alıb. Vaksin Rusiyanın Qamaleya adına Epidemiologiya və Mikrobiologiya Elmi Tədqiqat Mərkəzi tərəfindən RBİF-nin dəstəyi ilə işlənib hazırlanıb. Bu, dünyada COVID-19-un profilaktikası üçün ilk qeydiyyata alınmış preparatdır.