BAKI, 23 dekabr — Sputnik. Koronavirusun immunitet yaddaşı infeksiyadan sonra səkkiz ay müddətində bədəndə qalır.
Sputnik Azərbaycan xarici mətbuata istinadla xəbər verir ki, bu barədə Avstraliyanın Monaşa Universitetinin alimləri araşdırma aparıblar.
Araşdırmada COVID-19-a yoluxmuş 25 könüllü iştirak edib.
Bədənin "yaddaşı" B hüceyrələri ilə əlaqələndirilir. Onlar virusu xatırlayır və bədənə yenidən daxil olduğu zaman müqavimət göstərirlər.
Alimlər 4 ilə 242 gün arasında koronavirusa yoluxmuş insanları müşahidə edərək, xəstələrin hər birindən 36 qan nümunəsi götürüb.
Müəyyən edilib ki, virusa qarşı antikorlar 20-ci gündə istehsal olunmağa başlayır.
Bir sıra tədqiqatlara görə, antikorlar bədəndən olduqca tez yox olur.
Ancaq SARS-CoV-2 virusunun zülallarını tanımaq qabiliyyətinə sahib B hüceyrələrinin koronavirus yaddaşı uzun müddət sabit olaraq qalıb.
Alimlərin fikrincə, bu fakt koronavirusa təkrar yoluxmanın az olduğunu və peyvəndlərin uzun müddət təsirli olacağını sübut edir.