BAKI, 10 noyabr - Sputnik. Ankaranın Dağlıq Qarabağdakı sülhməramlı fəaliyyəti atəşkəsə nəzarət üzrə ikitərəfli mərkəz çərçivəsi ilə məhdudlaşır.
Sputnik AzərbaycanRİA Novosti-yə istinadla xəbər verir ki, bunu jurnalistlərə Rusiya Xarici İşlər Nazirliyindəki mənbə bildirib.
“Azərbaycan Respublikası Prezidentinin, Ermənistanın Baş nazirinin və Rusiya Prezidentinin bu ilin 9 noyabr bəyanatında Dağlıq Qarabağ münaqişəsinin gələcək nizamlanmasının parametrləri dəqiq göstərilib”, - deyə mənbə Türkiyənin Dağlıq Qarabağda Rusiya ilə birlikdə sülhməramlı fəaliyyəti barədə sualı cavablandırarkən deyib.
O, "bu sənədə uyğun olaraq, Rusiya Federasiyasının sülhməramlı kontingentinin Dağlıq Qarabağdakı təmas xətti boyunca və Laçın dəhlizi boyunca yerləşdirildiyini" xatırladıb.
"Türkiyənin rolu, yaradılan Rusiya-Türkiyə birgə atəşkəsə nəzarət mərkəzinin çərçivəsi ilə məhdudlaşır və birbaşa sülhməramlı əməliyyatla əlaqəsi yoxdur", - deyə Rusiya XİN-dəki mənbə bildirib. O əlavə edib ki, bu Mərkəz "Dağlıq Qarabağla bitişik olmayan Azərbaycan ərazilərində yaradılır".
Mənbənin sözlərinə görə, "bu Mərkəzdən rus hərbçilərinin türk həmkarları ilə birlikdə əllərindəki texniki vasitələrdən istifadə edərək atəşkəsə riayət olunmasını izləyəcəyi ehtimal edilir".
"Hərbi idarələr Mərkəzin fəaliyyətinin detalları üzərində işləyir", - deyə mənbə əlavə edib.