Azərbaycanın Qarabağ bölgəsinin necə bərpa olunması və inkişaf etməsi barədə aktual xəbərlər

Gəncə terrorunda gözlərini itirən Pərvin - "O, bir daha balalarını görə bilməyəcək"

14:35, 20 Oktyabr 2020

"Oktyabrın 17-də Gəncə terrorunun qurbanı olanlar arasında onun da adı var - Qasımova Pərvin Nüsrəddin qızı".

BAKI, 20 oktyabr — Sputnik. "O təkcə öz dünyasının deyil, həm də balalarının görən gözü idi - Pərvin Nüsrəddin qızı Qasımovanın (19.03.1994) cəmi 26 yaşı var. Dünənə qədər həyat onun üçün güllü-çiçəkli idi. Bu gündən isə qaranlıq, zülmət... Dünənə qədər o, iki gül balasının necə böyüdüyünə şahid idi. Bu gündən isə doğmalarının üzünə həsrət..."

Sputnik Azərbaycan-ın məlumatına görə, bu sözləri aparıcı Hacı Nuran Hüseynov sosial şəbəkə hesabında yazıb. O, Pərvinin ailə fotolarını yayaraq həyat hekayəsini belə dilə gətirib: "Daha o, nə gün işığı görəcək, nə anasının üzünü, nə də balalarının böyüməyini... Sadəcə, sığal çəkəcək, oxşayacaq onları. Çünki qatil erməni onu dünya işığına həsrət qoydu. Oktyabrın 17-də Gəncə terrorunun qurbanı olanlar arasında onun da adı var - Qasımova Pərvin Nüsrəddin qızı. İki gözünü itirdi Pərvin. Dağıntılar altından sağ çıxarıldığına şükr edir doğmaları. O da üsyankar deyil. "Gözüm Vətənə qurban olsun" deyir. "Mən balalarımı bəsirət gözümlə görər, ürəyimin gözü ilə sevərəm. Təki Vətən sağ olsun, oğullar şəhid olmasın", - deyir. Bundan böyük ürək olarmı? Gənc bir qızın məntiqi qarşısında baş əymək gərək. Mən bu xalqın mərd oğul, qızları ilə fəxr edirəm. Biz ona görə bu gün tarix yazırıq. Çünki bu xalqın anaları Vətən uğrunda şəhid olan oğul tabutunu çiynində daşıyar, qızları isə "gözüm Vətənimə qurban olsun" deyər!"