BAKI, 19 oktyabr - Sputnik. "Mən bir daha Azərbaycan Prezidenti İlham Əliyevin sözünü təkrarlamaq istəyirəm: Azərbaycan Ordusu üçün Ermənistanın ərazisində heç bir hədəf yoxdur".
Bunu bu gün ADA Universitetində diplomatik korpusun nümayəndələri üçün keçirilən brifinqdə Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev deyib.
Sputnik Azərbaycan xəbər verir ki, H.Hacıyev Azərbaycan Silahlı Qüvvələrinin Azərbaycanın suveren sərhədləri çərçivəsində addımlar atdığını və dinc əhaliyə qarşı heç bir əməliyyat keçirmədiyini bildirib:
"Azərbaycan münaqişənin sülh yolu ilə həllini dəstəkləyir. Lakin bu danışıqlar bir nəticəyə gətirməlidir. Biz beynəlxalq ictimaiyyətə müraciət edirik ki, bizim səylərimizi dəstəkləsin. Ermənistan tərəfinin könüllü adı altında əraziyə gətirdiyi muzdlu döyüşçülərlə bağlı məsələyə də diqqət çəkmək istəyərdik. Bu, region üçün böyük bir təhdiddir. Hazırda onlardan Azərbaycana qarşı istifadə olunur. Biz, həmçinin, Ermənistana silah və sursat çatdırılması məsələsini də vurğulamaq istəyərdik. Bu silah-sursat bəzən mülki təyyarələrlə daşınır. Bizdə bu barədə ətraflı məlumatlar var.
Bu mülki təyyarələri idarə edən şirkətlər Avropa ərazisində yerləşir, bununla da, bütün konvensiyaları, beynəlxalq hüququ pozmuş olurlar. Biz həmin ölkələrə müraciət etmək istəyərdik ki, mülki uçuşlar və mülki təyyarələr vasitəsi ilə "qara bazar"da satılan silahların, raket sistemlərinin, xüsusən də “Smerç” raketlərinin Ermənistana çatdırılmasının qarşısını alsınlar. Çünki bu raketlər Azərbaycanın dinc əhalisinə qarşı istifadə olunur. Beynəlxalq ictimaiyyət anlamalıdır ki, Ermənistana çatan hər hansı silah Azərbaycanın dinc əhalisinə qarşı istifadə olunacaq".