BAKI, 14 oktyabr - Sputnik. Mütəmadi təmasda olduğum yaxın dostum İbrahim Kalınla telefon danışığından məmnun oldum. ATƏT və Minsk Qrupunun üzvü və regionda aparıcı ölkə kimi Türkiyənin Ermənistan-Azərbaycan münaqişəsinin həlli prosesindəki vacib rolunu bir daha ifadə etdik".
Sputnik Azərbaycan-ın məlumatına görə, bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev özünün "Twitter" səhifəsində bildirib.
Qeyd edək ki, ötən gün Türkiyə Prezidenti Rəcəb Tayyib Ərdoğanın sözçüsü İbrahim Kalın ABŞ prezidentinin milli təhlükəsizlik məsələləri üzrə müşaviri Robert O'Brayanlaq telefon söhbətində Ermənistanın Azərbaycana qarşı hücumlarından bəhs edib.
Söhbət zamanı Azərbaycanla Ermənistan arasında humanitar prinsiplərlə elan edilən atəşkəsə dəstək ifadə edilib. Lakin tərəflər qeyd ediblər ki, problemin biryolluq həlli ancaq Ermənistan Dağlıq Qarabağ və işğal etdiyi ətraf rayonlardan çəkiləndən sonra mümkündür.
Türkiyə və ABŞ prezidentlərinin nümayəndələri söhbət əsnasında onu da vurğulayıblar ki, Ermənistanın mülki əhalini hədəfə alan hücumları beynəlxalq hüquqa ziddir və qəbul edilə bilməz. Azərbaycanın ərazi bütövlüyü bərpa olunmaqla BMT TŞ-nin və ATƏT-in qətnamələri çərçivəsində beynəlxalq ictimaiyyətin konkret addımlar atmasının vacibliyi qeyd olunub.
Kalınla O'Brayan Şərqi Anadolu, Liviya münaqişələrini də müzakirə ediblər. Görüşdə Türkiyə və ABŞ arasında iqtisadi əlaqələrin canlandırılması və müdafiə sənayesi sahəsində işbirliyinin inkişafı ilə bağlı məsələlər ətrafında da fikir mübadiləsi aparılıb.