BAKI, 28 sentyabr — Sputnik. Moldova Prezidenti İqor Dodon bazar ertəsi keçirilmiş brifinqdə Azərbaycan və Ermənistan rəhbərliyinə atəşi dayandırmaq çağırışı ilə müraciət edib.
Sputnik Azərbaycan RİA Novosti-yə istinadən xəbər verir ki, Dodon Azərbaycan və Ermənistan arasında baş verənlərin Moldovanı narahat etdiyini deyib.
"Hər iki ölkə Moldova üçün dostdur, bizim yaxşı əlaqələrimiz var, o cümlədən ən yüksək səviyyədə. Biz atəşi dayandırmağa, əmin-amanlığa və sülhə çağırırıq", – Dodon bildirib.
Prezident ayrıca olaraq Moldovada yaşayan azərbaycanlı və erməni diasporunun nümayəndələrinə müraciət edib.
"Biz bir çox millətlərin sülh şəraitində yaşadığı bir dövlətik, ona görə də hamını əmin-amanlığı qorumağa çağırıram. Başa düşürük ki, vəziyyət sadə deyil, emosiyalar çoxdur, lakin mən sizə müraciət edirəm — əziz vətəndaşlar, azərbaycanlılar və ermənilər, bu münaqişəni Moldova ərazisinə keçirməyin, bizdə sakitlik olmalıdır — etirazlar və destabilizasiya olmadan", – Dodon vurğulayıb.