BAKI, 28 avqust — Sputnik. Belarus Prezidenti Aleksandr Lukaşenko etirazlar zamanı iqamətgahının yanında əlində avtomat tutduğuna görə onu tənqid etməməyi xahiş edib.
Sputnik Belarus xəbər verir ki, Lukaşenko öz xalqına nəinki atəş açmaq, hətta heç vaxt barmağı ilə belə göstərmədiyini deyib.
"Və siz məni tənqid etməyə başlayırsınız ki, mən avtomatla küçələrdə qaçıram və öz xalqıma atəş açmağa hazıram. Qulaq asın, mən əsrin dörddəbiri ərzində xalqa heç vaxt barmağımla göstərməmişəm, o ki qaldı atəş açım", - Belarus lideri bildirib.
Ötən həftəsonu etiraz aksiyalarının iştirakçıları Aleksandr Lukaşenkonun Minskdəki iqamətgahına – Müstəqillik Sarayına çatıblar. Çevik polis qüvvələri onların qarşısını alıb. Daha sonra Lukaşenko helikopterlə iqamətgahına gəlib. Media Belarus prezidentinin helikopterdən zirehli jiletdə və əlində avtomatla düşməyinin fotoşəkillərini yayıb.