BAKI, 26 avqust — Sputnik, Mariya Merkulova. Qiyməti 80 milyard dollar olan 320 milyard kubmetrlik qaz ehtiyatı kifayət qədər sanballı səslənir. Analitiklər Ankaranın bu yaxınlarda Qara dənizdə qaz ehtiyatlarının aşkar edilməsi ilə bağlı bəyanatından sonra öz qiymətləndirmələrini və makroiqtisadi proqnozlarını verməyə tələsiblər.
Türkiyənin bundan sonra qaz ehtiyacını qarşılaya bilməsi və hətta ən azından regional əhəmiyyətli ixracatçıya çevrilməsi müzakirə olunub. Bir sıra analitiklər "Türk Axını" boru xətti ilə bağlı narahatlıq bildirib, digərləri isə hasilatın dəyərini hesablayıblar.
Bəzi analitiklər isə məsələ ilə bağlı fərqli mövqe tutublar. Türkiyənin "Sözcü" nəşrinin müəlliflərindən biri Rəhmi Turan hesab edir ki, ölkədə artıq siyasi ənənə yaranıb – seçkidən əvvəl neft və ya qazın aşkar edilməsi ilə bağlı nəhəng xəbərləri bildirmək.
Ən yaxın seçkilər 2023-cü il üçün nəzərdə tutulub və bu miqyaslı piar kampaniyası erkən görünür. Lakin hasilatın başlaması məhz 2023-cü ilə planlaşdırılır, ona görə də üç ildən sonra bu xəbər daha da əhəmiyyətli ola bilər.
Türkiyə hazırda, demək olar ki, tamamilə xaricdən "mavi yanacağın" tədarükündən asılıdır. Qaz ehtiyatlarının aşkar edilməsi isə ölkənin bütün iqtisadi problemlərinin həlli kimi görünür.
Lakin "Sözcü"nün analitiki bununla razılaşmır: birincisi, ölkənin cəmi üç il ərzində bütün emal və hasilat proseslərini qura bilməsi ehtimalı azdır; ikincisi isə, yaxın yeddi il üçün istehsal limiti ildə 8-10 milyard kubmetrdir ki, bu da Türkiyənin tələbatının yalnız beşdə biri deməkdir.
Materialın müəllifi yekunlaşdırır ki, əgər tam enerji müstəqilliyi gələcəksə, onda bu, tez baş verməyəcək.