BAKI, 24 avqust – Sputnik. Gürcüstanda son bir sutka ərzində yeni növ koronavirusa (COVID-19) 10 yoluxma halı qeydə alınıb.
Sputnik Azərbaycan-ın xəbərinə görə, bu barədə Gürcüstan hökümətinin koronavirusla mübarizə çərçivəsində yaratdığı xüsusi internet saytında məlumat verilib. Bununla da qonşu ölkədə koronavirusa yoluxanların sayı 1421 nəfərə çatıb.
Qeyd edək ki, Gürcüstanda koronavirus səbəbi ilə hazırda 7005 nəfər karantində saxlanılır, 255 nəfər isə stasionar şəraitdə müalicə olunur. Yoluxanlardan 1137 nəfərin sağaldığı, 17 nəfərin isə vəfat etdiyi bildirilir.
Ermənistanda isə son sutka ərzində 33 nəfər koronavirus infeksiyasına yoluxub. Bununla da ölkədə COVID-19-a yoluxanların ümumi sayı 42 825-ə çatıb.
Son sutkada Ermənistanda daha 2 nəfər koronavirusdan ölüb. Ölkədə bu virusdan ölənlərin ümumi sayı 854-də çatıb.
Ermənistanda indiyədək koronavirusdan sağalanların sayı 36 049 nəfərdir, 5666 nəfər müalicə olunur.