BAKI, 21 avqust — Sputnik. Rusiyanın general-mayor rütbəsində böyük hərbi müşaviri Vyaçeslav Qladkixin Suriyada həlak olmasının videogörüntüləri yayılıb.
Sputnik Azərbaycan xəbər verir ki, hadisə yerindən videogörüntülər "Vestnik Damaska" Telegram kanalında yerləşdirilib.
Kadrlarda texnika karvanının yolda dayandığı, onun yanından bir neçə adamın keçdiyi və onlardan birinin rus dilində danışdığı görünür. Onların maşınlardan birinin yanından keçdiyi an partlayıcı qurğu işə düşür.
Bildirilir ki, həlak olmuş rusiyalı Palmiranın azad olunmasında iştirak edib. O, Deyr-əz-Zor şəhərində suriyalılara kömək edən hərbi müşavirlər qrupuna rəhbərlik edirmiş.
Qladkixin ölümü haqqında avqustun 18-də məlum olub. Məlumat verilib ki, humanitar missiyadan qayıdan karvanın yolunda partlayıcı qurğu işə salınıb. Bu, Suriyanın şimalındakı Deyr-əz-Zor şəhəri yaxınlığında yerləşən Ət-Taym neft yatağının yaxınlığında baş verib. Qladkixlə yanaşı Əl-Məyadin şəhərinin milli müdafiəsinin komandanı Məhəmməd Taysar Əz-Zahir və onun tabeliyində olan əsgərlər həlak olublar.