BAKI, 9 iyun — Sputnik. ABŞ-ın Virciniya ştatının Enriko mahalında "Ku Kluks Klan" sağçı radikal təşkilatının lideri Harri Rocers avtomobilini etirazçıların üstünə sürdüyünə görə saxlanılıb.
Sputnik Azərbaycan "Henrico Citizen" nəşrinə istinadən xəbər verir ki, Rocersin avtomobilini bazar günü axşam saatlarında etirazçıların üstünə sürməsi nəticəsində bir nəfər xəsarət alıb.
Qeyd olunur ki, 36 yaşlı Rocersə qarşı araşdırma aparılıb. O, qəsdən bədən xəsarəti yetirməkdə, əmlakın korlanmasında və hücumda ittiham olunur.
Rocers həmçinin nifrət zəminində cinayət törətməkdə ittiham oluna bilər.
Mayın 25-də Minneapolisin polis əməkdaşları afroamerikalı Corc Floydu saxlayıblar. Həbs zamanı polis zabiti Floydun boynunu dizi ilə yerə sıxıb. Floyd boğulduğunu deyib, amma polis əməkdaşları buna diqqət yetirməyiblər. Nəticədə, kişi reanimasiyada dünyasını dəyişib. Bu, ABŞ-da kütləvi etirazlara və iğtişaşlara səbəb olub.