BAKI, 16 aprel — Sputnik. "Azərbaycanda son günlər koronavirusa yoluxanların 20 faizi Rusiya Federasiyasından gələn vətəndaşlar arasında müəyyən olunub". Sputnik Azərbaycan-ın məlumatına görə, bunu Prezidentin köməkçisi Hikmət Hacıyev Operativ Qərargahın brifinqində çıxış edən zaman bildirib. O bildirib ki, Azərbaycanın diplomatik nümayəndələri arasında koronavirusa yoluxma halı baş verməyib. Onun sözlərinə görə, diplomatlarımız gücləndirilmiş şəkildə işlərini davam etdirirlər.
Diasporla İş üzrə Dövlət Komitəsinin sədri Fuad Muradov isə bildirib ki, diaspor fəalları arasında koronavirusa yoluxanlar var: "Xaricdə yaşayan diaspor fəalları arasında koronavirus infeksiyasına yoluxanlar var. Bunlar Almaniya, İsveç, Fransa, ABŞ, Finlandiya, Ukrayna, Gürcüstan, Rusiyada olan fəallarımızdır. Komitə tərəfindən onların əksəriyyətinin gündəlik vəziyyəti ilə maraqlanılır. Hazırda onların sağlıq durumları yaxşıdır".