BAKI, 13 aprel — Sputnik. Rusiyada koronavirusla bağlı vəziyyət hər gün dəyişir, özü də yaxşı tərəfə yox. Sputnik Azərbaycan "RİA Novosti"-yə istinadən xəbər verir ki, bunu Rusiya Prezidenti Vladimir Putin koronavirusla mübarizə tədbirləri ilə bağlı keçirdiyi iclasda bildirib.
"Rusiyada koronavirusla bağlı vəziyyət hər gün dəyişir, özü də yaxşı tərəfə yox. Pasiyentlərdə xəstəlik daha da ağırlaşır. Moskva, Moskvaətrafı və milyonlarla əhalisi olan şəhərlərdə risk dərəcəsi yüksək olaraq qalır", - deyə Putin vurğulayıb.
Putin eyni zamanda ehtiyac yaranacağı təqdirdə koronavirusla mübarizədə Müdafiə Nazirliyinin vasitələrindən də istifadənin vacibliyini vurğulayıb.
Bir sutka ərzində Rusiyada 2558 koronavirusa yoluxma halı aşkarlanıb. Bir gün ərzində qonşu ölkədə 18 nəfər ölüb.
Ümumilikdə, Rusiyada bu xəstəliyə yoluxanların sayı 18328-ə çatıb. Onlardan 1070-i sağalıb, 148-i ölüb.
Xatırladaq ki, koronavirus infeksiyası ötən ilin dekabrında Çinin Uhan şəhərində yayılmağa başlayıb. Hazırda virus dünyanın əksər regionları və ölkələrində yayılıb. Dünyada koronavirus infeksiyasına indiyədək yoluxanların sayı 1,8 milyonu keçib, 114 mindən çox adam isə virus səbəbilə ölüb.
Ümumdünya Səhiyyə Təşkilatı (ÜST) fevralın 11-də infeksiyanın törətdiyi xəstəliyin adını COVID-19 qoyub, martın 11-də isə koronavirusu pandemiya elan edib.