BAKI, 8 aprel — Sputnik. SARS-Cov-2 koronavirusuna yoluxaraq, xəstəliyi simptomsuz keçirib sağalanların ağciyərlərinin zədələndiyi ortaya çıxıb.
Sputnik Azərbaycan bildirir ki, yapon alimlərinin bunu təsbit edən tədqiqatlarının nəticələri Şimali Amerika Radioloji Cəmiyyətinin saytında yerləşdirilib.
“Diamond Princess” kruiz laynerində koronavirusa yoluxan 104 adamdan 76-sında COVID-19 xəstəliyi heç bir əlamət olmadan keçib. Ancaq onlardan 41-nin ağciyərlərində “tutqun şüşə effekti” adlanan dəyişiklik nəzərə çarpıb.
“Diamond Princess” kruiz gəmisi fevralda Yaponiya sahillərinə yan alıb. Gəmidə cəmi 3.7 min sərnişin olub. Onlardan 705 nəfərdə koronavirus təsbit edilib. Xəstəliyi yayan isə 80 yaşlı çinli kişi olub.
Ümumdünya Səhiyyə Təşkilatı (ÜST) martın 11-də yeni tip koronavirusun (SARS-CoV-2) səbəb olduğu COVID-19 xəstəliyinin yayılmasını pandemiya elan edib. ÜST-ün son məlumatına görə, dünyada artıq 1.4 milyondan çox yoluxma faktı qeydə alınıb, 81 mindən çox insan dünyasını dəyişib.