Hazırda Azərbaycanda xüsusi rejimli xəstəxanalara yerləşdirilən 104 nəfər aktiv koronavirus xəstəsi həkim nəzarəti altındadır, onlardan 5 nəfərin vəziyyəti ağır, 9 nəfərin vəziyyəti isə orta ağır qiymətləndirilir, digərlərinin səhhəti stabildir. Həmin şəxslərin müalicəsi ilə bağlı zəruri tədbirlər davam etdirilir.
Ötən müddət ərzində Azərbaycanda insanların yeni koronavirus (COVİD - 19) infeksiyasına yoluxma hallarının müəyyənləşdirilməsi ilə əlaqədar 20 mindən artıq test aparılıb.
Bu ümumdünya bəlası ilə mübarizənin ön sırasında şübhəsiz ki, səhiyyə işçiləri dayanır. Əsasən onların fədakar əməyi koronavirusun geniş vüsət almasına imkan vermir. Lakin bu məsələdə insanların özlərinin də üzərinə az məsuliyyət düşmür.
National Prime Hospital tibb mərkəzinin kollektivinin hazırladığı rolikdə çox aydın şəkildə vətəndaşların virusa yoluxmamaq üçün əməl etməli olduqları ehtiyat tədbirləri göstərilib.